Zuzendariak ikaratuta begiratzen zuen patiora bere bulego txiki eta iluneko leihotik. Txirrinak aspaldi jo zuen, baina maila guztietako ikasleak bertan bilduta zeuden oraindik. Batxilergoko ikasle bat futbol-zelai ondoko petrilera igota zegoen. Berrehun begi ernek bere mugimendu bakoitza jarraitzen zuten. Ikasleak sekula ez ziren, klase bakar batean ere, horren adi egon, pentsatu zuen petralki zuzendariak.
ENTZUN oihukatu zuen ikasleak. Apur bat urduri zegoela antzematen zen. BUKATU DA ZUZENDARITZA AUTORITARIO HONEN DIKTADURA. EZ GARA KLASERA SARTUKO GURE ESKAKIZUNETAKO BAKOITZA ONARTU ARTE.
Patioaren atzealdean irakasle taldetxo bat zegoen. Ikasleen bila jaitsi ziren txirrinak jo eta barrura sartu ez zirela ikusi zutenean. Historia irakaslea poztu egin zen ikaslea “diktadura” hitza erabiltzen entzutean. Izan ere, frankismoa lantzen ari ziren orduantxe.
GUTAKO BATZUK URRUTITIK ETORRI BEHAR GARA. GOIZEKO SEI ETA ERDIETAN EDO ZAZPIETAN ESNATZEN GARA. ETA 2 MINUTU BERANDU IRISTEAGATIK KANPOAN UZTEN GAITUZTE. NEGU HOTZEAN ERE EZ DIGUTE UZTEN ESKOLARA SARTZEN.
DBH-1eko haur batek HORI HORI oihukatu zuen, eta beste batek, NI SEIETAN JAIKITZEN NAIZ eta petrilean zegoen ikasleak HORI TERRIBLEA DA esan zuen.
IDEIA BAT DAUKAT oihukatu zuen zaintza gelan oso ezaguna zen aurpegi batek. Ikasle guztiak berari begira jarri ziren. BERANDU IRISTEAGATIK KANPOAN UTZITAKO UME BAT BAHITU BEHARKO GENUKE GOIZ BATEAN. LEHENGO MAILAKO BAT AHALIK ETA TXIKIENA. HORRELA ZUZENDARITZAREN UTZIKERIA SALATU ETA ESTORTSIONATU AHALKO GENITUZKE.
Latineko irakaslea barrezka hasi zen, baina zuzendariak leihotik zakur aurpegiarekin begiratzen ziola jabetu eta disimulatzen saiatu zen; arrakasta handirik gabe, esan beharra dago.
ETA ARAZOA EZ DA HORI BAKARRIK, jarraitu zuen petrilera igota zegoen ikasleak.
BATXILERGOKO IKASLE BAT KLASEEN EHUNEKO HOGEIRA FALTATZEN BADA EZ JARRAITURA BIDALTZEN DUTE. EZ DU AXOLA LANEAN ARI DEN EDO ZER EGOERA DUEN ETXEAN EDO BESTE ZE ARAZO DITUEN. BEHIN BAT EZ JARRAITURA BIDALI ZUTEN BI ASTE PNEUMONIAREKIN OSPITALIZATUTA EGON ZELAKO.
DBHko ikasleek serio-serio entzuten zituzten nagusiagoen aldarrikapenak, eta haiekiko elkartasuna sentitzen zuten. Zuzendariak, gorputz erdia leihotik kanpo zeukala, klasera itzultzeko egin zien garrasi hemezortzigarren aldiz, baina aurreko guztietan bezala, ikasle bakar batek ere ez zion jaramonik egin. Irakasleek ere jada utzia zioten zuzendariak makakorro egiten zuen bakoitzean leihora begiratzeari.
ETA BESTE ALDETIK DAGO TXANGOEN DIRUARENA. AURREKO URTEAN ERABAKI ZUTEN IKASLEOK TXANGOENTZAKO DIRUAREN ERDIA ORDAINDU BEHAR DUGULA. BADAKIZUE ZUZENDARITZAK AURTEN SOFA BERRIAK EROSI DITUELA IRAKASLE GELARAKO? AKASO BALIO DU GEHIAGO HAIEN IPURDIEN EROSOTASUNAK GURE TXANGOEK BAINO?
Ikasle gaztetxoenei algararen bat atera zitzaien ipurdi hitza entzutean, baina laster berreskuratu zuten konpostura.
ETA ESATEN DUTE GAINERA DIRURIK EZ BADUGU HAIENGANA JOTZEKO. BAINA EZ ZAIE OKURRITZEN HAU GURETZAKO UMILIANTEA DELA ETA ARAU HONEKIN IKASLE ASKOK TXANGOETARA EZ JOATEA ERABAKI DUTELA ETA TXANGOETARA JOATEA ONDO DAGO.
Entzuleek baietz egin zuten buruaz. Matematika irakaslea akordatu zen Zientzia Museora antolatutako txangoa duela gutxi bertan behera geratu zela, ikasle gutxiegik eman baitzuten izena autobusa antolatu ahal izateko.
ETA HAU GUZTIA ALDATU ARTE EZ GARA HEMENDIK MUGITUKO. ETA POLIZIA ETORTZEN BADA ERE EZ GAITUZTE KLASERA SARTUKO.
BAINA NIK AMONARENGANA JOAN BEHAR DUT AFALTZERA oihukatu zuen, atsekabez, ahots batek.
LASAI esan zion petrileko ikasleak ESKOLA AMAITZERAKO EZ BADUTE AMORE EMATEN BIHAR LEHEN ORDUAN PATIORA ETORRI ETA GAUZA BERA EGINGO DUGU.
Ikasle guztiak txistuka eta txaloka hasi ziren ero moduan. Irakasleak ere txaloka ari ziren, hunkituta. Patioko giroa hain zen euforikoa sentitu baitzuten haien bihotzek eztanda egin eta inguru guztia zipriztinduko zutela ausardiaz eta zorionez.
Zuzendariak azken garrasi desesperatu bat bota zuen errefortzuen bila joan aurretik. DBHko koordinatzailea prest zegoen zegokion lanerako, eta era solemnean heldu zion besotik. Baina ikasketa-burua armairu batetik arrastaka atera behar izan zuten, hain zegoen bere onetik aterata.
Denek espektazioz ikusi zuten nola atera ziren hirurak patiora. Ikasleek sei delegatu bidali zituzten beraiekin hitz egitera, maila bakoitzeko ordezkari bana. Irribarrez hurbildu ziren zuzendaritza taldearengana, bataila irabazi dutela dakitenen lasaitasunarekin.